بطنى بيوجعنى

بطنى بيوجعنى

ياعالم بطنى بيوجعنى

تسألنى عندك برد ؟

اقولك لاه

اكلت خضار او فاكهة مسرطنة

بارضو لاه

طب ايه السبب ياعم ؟

اقولك

يعقل فى بلد زى مصر وزير الاعلام السابق صفوت الشريف يتضح انه قواد وبتاع نسوان وكان منصبه وزير الاعلام طب اعلام ايه ياعم ما كانوا يسموها وزارة الفرفشة والنعنشه

او وزارة النجاسة

تانى حاجه

رئيس وزراء مصر يعقل ان اسمه احمد نظيف طب ماشى نظيف نظيف بس يكون نظيف مش حرامى يعنى اسمه نظيف وهوه حرامى ورئيس وزراء

والتانى اسمه الفقى وهوه حلنجى واستاذ جامعة ومزور كبير

واللى ما يتسمى اسمه مبارك وهوه شايل البركة والخير من البلد دى

والنبى دى مش حاجه توجع البطن

ويجعله عامر ي

يا بلد اخيرا لقيت ليها اصحاب

افتكاسة

طبعا كلنا بلا استثنا استمتعنا مع مبارك ونظامه طول تلاتين سنة بالضرب على القفا وعلى ماخفى

وانا والله عاوز ارد لمبارك الهدية واشكره على جمايله اللى عملها فينا السنين اللى فاتت وعلشان كده باقترح عمل سجن جديد من الزجاج ووضع الرئيس المخلوع فيه

ويشرف مع سيادته كل افراد حكوماته السابقة

بالاضافة لكل الحرامية الصغار والكبار وكل من تسبب فى ضرر لهذا البلد ولافراده

تسألنى ايه الحكمة ؟

أقولك طبعا كل واحد فينا ليه ثأر عند كل واحد من الاكابر دول

صح ياعم ؟

طيب وليه نتشتت على سجون مصر علشان ناخد بطارنا منهم ما الاحسن يتجمعوا فى سجن واحد ويكون سجن فخم من الزجاج زى قسم الزواحف فى حديقة الحيوان ويكون فيه مولات راقية تعرض الحديث من البلغ والجزم والخوازيق علشان كل واحد فينا ياخد طاره بالطريقة اللى يحبها ولو حد مش عاجبه الحاجات دى يبقى يتف على المسئول وعلى سنينه السوده وبكده يبقى كل واحد اخد بطاره منهم وبس ده كله يكون بعد ما النائب العام يكون جاب فلوسنا اللى نهبوها الحرامية دول

وطبعا الفكره دى هتدر دخل كبير على البلد علشان كل حاجه هتكون بالتسعيرة يعنى رجم شيخ المنصر بالبلغ يكون 10جنيه والتف عليه يكون ب5جنيه

وبكده نسدد ديون مصر وينصلح حال البلد دى

ولا ايه رايك يامعلم ؟؟

ويجعله عامر

يا بلد اخيرا لقيت ليها اصحاب

الحاج حسنى مبارك

الحاج حسنى مبارك

فاكرين نكتة اسلام هتلر

المسيحى لما يحب يحج بيروح القدس بالبلدى بيقدس والمسلم لما بيحب يحج بيروح السعودية علشان يحج

سامع واحد بيقوللى ايه علاقة ده بالحاج حسنى مبارك

ما تستعجلش يلعم هأقولك

ملك السعودية دعا الاخ حسنى مبارك يروح السعودية يعمل عمرة ويقعد هناك شوية يأكلوه ما لذ وطاب من انواع الفتة بعد ما اكلنا احنا البلوظة اربعين سنة

بس العقل بيقول المسلم يروح يحج فى السعودية والمسيحى يروح يقدس فى القدس طب ياعالم واللى سرق ونهب وافسد وخان بلده لصالح اسرائيل يروح يحج فين ؟؟؟؟؟؟؟؟؟؟؟؟؟؟؟؟؟؟

حد يجاوب على السؤال ده

عاشان خاطر النبى

ويجعله عامر

يابلد اخيرا لقيت اصحابها

سرقة بالاكراه

ياللى نورك غطى كل الارض وولادك غلابة
صوت بينده جوه قلبى محتاج الاجابة
مين بيعبد فرعون وشايل له الربابة ؟؟؟؟
مين بيكتب سطر فى فصول الخيابة
مين بيصنع غول بينهش
تحسده ع الفجر انياب الديابة
احنا اصل الداء وخيبتنا قوية ...
...مش طيابة ؟.؟؟
حد فاكر اسم ريسنا الهمام ؟؟؟؟؟؟؟؟؟؟؟؟؟
اللى فاتح مصر لولاد الحرام
اللى ناهب قوت عيالى فى الزحام
اللى سارق حلمى مش عارف انام
اصل العمالة مش كلام
دى عيشة اكتر م الكلاب
هوه ينهب
واحنا بنسف التراب
والمحكمة مفيش حساب
طب يا عالم
مش حرام
30سنة ناهب بلدنا
مش كلام
فيه ناس بتحلم بالسحاب
يعنى المداين والمصانع والشباب
وناس بترسم للخراب
وانا حلمى جازمة
وفردة واحدة م الشراب
والمحكمة مفيش حساب

انت فين ياقاضى وترد المظالم ?
نفسى عدلك ينتشر
ويرد عنا كل ظالم